Автомашинд улиралд нь тохирсон өвөл, зуны дугуйг сольж тавьснаар та өөрийн эрүүл мэнд, эд хөрөнгөө хамгаалаад зогсохгүй шатахуун ч бага зарцуулна

Хальтиргаатай нөхцөлд автомашины дугуй замтай барьцалдах хүч 5 дахин багасдаг.

Өвлийн хальтиргаа гулгаа ихтэй үед машиныхаа дугуйг солихгүй бол аваар осол гарах, гэмтэж бэртэх аюултай байдаг бөгөөд төдий чинээ ач холбогдол өгч, ямар чанартай, аль улсад үйлдвэрлэсэн гэдгээс нь шалтгаалж машиныхаа дугуйг сонгох хэрэгтэй байдаг.

1. Дугуй нь явалтыг зөөлрүүлэх, зорчигчдын тав тухтай байдлыг хангах, дугуйн замтай барьцах чадварыг дээшлүүлэх, автомашины тогтворжилтыг сайжруулах, туулах чадварыг нэмэгдүүлэх зэрэг үүрэгтэй учир, дугуйг улиралд нь тохируулж цаг алдахгүй сольж байх нь хамгийн зөв юм.

2. Ерөнхийдөө автомашины хувьд "Winter Tires" (S) буюу өвлийн, "All Season" (M+S) буюу бүх улиралд явахад тохиромжтой, "Summer Tires" (М) буюу зуны улирлын гэсэн 3 төрлийн дугуйнууд байдаг бөгөөд дугуйн дээрх тэмдэглэгээг сайтар анзаарах хэрэгтэй. Хамгийн чухал нь өвлийн улиралд зориулсан М+S (Энэ нь шавар болон цасны зориулалттай дугуйг илтгэж байдаг) гэсэн тэмдэглэгээтэй дугуйг сонгох хэрэгтэй.

3. M+S тэмдгээс гадна, цасан ширхэгийн тэмдэглэгээ байвал энэхүү дугуй нь мөс болон цасан дээр явахад ямар нэгэн бэрхшээлгүй цэвэр өвлийн дугуй юм. Мөн ганц тэмдэглэгээ гэлтгүй тухайн дугуй нь хэр зэрэг зөөлөн резинээр хийгдсэн эсэх нь мөстэй болон цастай замтай харьцах чадварт маш ихээр нөлөөлөх бөгөөд зөөлөн байх тусам халтирах магадлал бага гэсэн үг. Тэгэхээр та өвлийн улирал M+S болон цасан ширхэгийн тэмдэгтэй дугуйг сонгож байхыг зөвлөе

4. Мөн хөдөө их явдаг хүмүүс дугуйн гинж, хадаастай дугуйг авч явах нь ирээдүйн эрсдэлээс урдчилан сэргийлэх ач холбогдолтой. Энэ гинж, хадаас нь их цастай, мөстэй замд дугуйн зүтгэх хүчийг сайжруулж цасыг хагалахад онцгой үүрэгтэй байдаг байна.

5. Дугуйг буруу ашиглах, дугуйн гүйлтийн нормыг их хэмжээгээр хэтрүүлэх, техник үйлчилгээ, засварыг цаг тухайд нь хийхгүй байх, жолоочийн ур чадвар муу зэргээс шалтгаалж дугуй хурдан элэгддэг гэдгийг анхаараарай.